« Amanat » партиясының Орталық аппаратында азаматтардың цифрлық сауаттылығын арттыру мен киберқауіпсіздігін қамтамасыз етуге бағытталған «Цифрлық қоғам» ауқымды жобасы таныстырылды.
Қазір ел тұрғындарының күнделікті өмірінде цифрлық технологиялардың кеңінен қолданылуы интернет-алаяқтық пен киберқауіптердің көбеюіне әкелді. Жыл сайын 20 мыңнан астам интернет-алаяқтық фактісі тіркелсе, оның 80 пайызы ашылмай қалып отыр. Осыған байланысты халықтың цифрлық сауаттылығын арттыру өзекті мәселеге айналды.
Мемлекет басшысы Қасым-Жомарт Тоқаев та балалардың цифрлық тәуелділігінің артуына алаңдаушылық білдірген болатын. «Amanat» партиясының ұйымдастыруымен өткен барлық деңгейдегі мәслихат депутаттарының II республикалық форумында Президент балаларға цифрлық гигиенаның негізгі ережелерін үйретудің маңыздылығын атап өтіп, танымал әлеуметтік желілердің тек балаларды ғана емес, ересектерді де зомбиге айналдыруы мүмкін екенін ескерткен еді.
Осыған орай, «Amanat» партиясы мемлекеттік органдармен және сарапшылармен бірлесіп, цифрлық сауаттылықты дамыту мен интернетті қауіпсіз пайдалану мәдениетін қалыптастыруға бағытталған «Цифрлық қоғам» жобасын әзірледі.
Таныстырылымда Мәжіліс төрағасының орынбасары, «Amanat» партиясы фракциясының мүшесі Альберт Рау еліміз цифрландыру деңгейі бойынша әлемде озық мемлекеттер қатарында екенін атап өтті.
«Шынында да, біздегі цифрлық даму деңгейіне Еуропаның ең дамыған елдерінің өкілдері таңғалып жатады. Алайда бұл үрдістің кері жағы да бар, ол – біздің қауіпсіздігіміз. Біздің басты міндетіміз – технологияларды енгізіп қана қоймай, адамдарды оларды қауіпсіз әрі саналы түрде қолдануға дағдыландыру. «Цифрлық санитария» деген ұғым бар. Біз IT компанияларға алғысымызды білдіреміз, олар өз бастамаларымен осындай жобаларды жүзеге асырып келеді. Алайда оларға біздің партиямыздың қолдауы қажет, өйткені біз ғана барлық тараптың күш-жігерін біріктіріп, кешенді «Цифрлық қоғам» жобасын құра аламыз», деді вице-спикер.
Ал «Amanat» партиясының атқарушы хатшысы Дәулет Кәрібек Қазақстан цифрландыруда үлкен жетістіктерге жеткенімен, қоғам жаңа сын-қатерлермен бетпе-бет келіп отырғанын айтып, осыған байланысты «Цифрлық қоғам» қанатқақты жобасын іске қосып отырғанын жеткізді.
ЮНИСЕФ деректеріне сәйкес, біздің балалардың 46%-ы интернетті 5-8 жас аралығында қолдана бастайды, ал олардың 37%-ы бос уақытының басым бөлігін желіде өткізеді. Бұл мәселені шешу үшін «Цифрлық қоғам» жобасы аясында балалар мен зейнеткерлерге арналған интерактивті білім беру курстарын ұйымдастыру, ата-аналармен кездесулер өткізу жоспарланған. Сондай-ақ мектептердегі қауіпсіздік сабақтарына «Киберқауіпсіздік» тақырыбы енгізілмек. Ал зейнеткерлер мен мүмкіндігі шектеулі азаматтарға арнайы оқыту курстары ұйымдастырылады. Сондай-ақ іс-шара барысында мемлекеттік органдар өкілдері мен сарапшылар да «Цифрлық қоғам» жобасына қатысты өз ұсыныстарын ортаға салды.
Қайсар ҚҰСАЙЫН
