Наурыз мейрамы қарсаңында Ш.Құсайынов атындағы Ақмола облыстық қазақ музыкалық-драма театрында қазіргі сән үлгісіндегі ұлттық киімдер көрсетіліміне арналған « Ұлттық киімдер – халық қазынасы» атты байқау өтті.
«Біртұтас тәрбие» бағдарламасын жүзеге асыру аясында Көкшетау қаласының №6 мектеп-лицейі ұйымдастырған шығармашылық байқауға облыс орталығындағы мектептердің 9-11 сынып оқушылары қатысты. Іс-шараның түпкі мақсаты – сан ғасыр бойы халықтың қазынасына айналған ұлттық құндылықтарды насихаттау арқылы мәнді мәдени мұраны қайта жаңғырту, сондай-ақ дәстүрлі ұлттық мәдениет негізінде өскелең ұрпақтың эстетикалық талғамын қалыптастыру. Байқау шарты бойынша қатысушылар қазақтың таным-түсінігі мен дәстүрлеріне сай тігілген ұлттық киім үлгілерін таныстырып, олардың жасалу барысы көрсетілген бейнероликтер ұсынды және осы орайдағы шығармашылық қабілеттерін ортаға салды.
Қазылар алқасы байқау жеңімпазы мен жүлдегерлерін және аталым иегерлерін ата-баба дәстүрлерін ескере отырып әзірленген заманауи киімде авторлық ізденістің болуы, таңдалған киім үлгісінің талғамға сай келуі секілді өлшемдер бойынша анықтады.
Байқау қорытындысында ерекшеленген оқушылар марапатталды. №6 мектеп-лицейінің 11-сынып оқушысы Дильнара Баетова бас жүлдені жеңіп алды. Бірінші орынды №17 мектеп-гимназиясының 9-сынып оқушысы Иная Молдабаева иеленді. Іс-шара соңы ұстаздар мен оқушылардың концерттік қойылымдарына ұласты.
Көкшетау
