Елордада «Deeptech бәйге» байқауы қорытындыланды. Сайыстың жалпы жүлде қоры 35 млн теңгені құрады. Назарбаев университетінде (NU – Nazarbayev University) өткен финалға Премьер-министрдің орынбасары Ермек Көшербаев, студенттер, зерттеушілер, білім, ғылым және бизнес өкілдері қатысты.
«Deeptech бәйге» байқауы – инкубация, акселерация, Jas Venture, Go Abroad және басқалары сияқты NU стартаптарын қолдау бағдарламалары түлектерінің жобаларын біріктіретін алғашқы ірі, жергілікті іс-шара. Байқауға қатысуға өтінімдерді жинау қаңтар айының соңында басталды. 100-ге жуық өтініш түсіп, жетекші бизнесмендер мен венчурлық инвесторлардан тұратын қазылар алқасының шешімімен финалға 10 жоба өтті. Ғылыми әзірлемелер мен инновацияларды ілгерілетуге, сондай-ақ халықаралық деңгейде бәсекеге қабілетті deeptech-стартаптардың экожүйесін қалыптастыруға бағытталған бастаманы NU-ға қарасты «Әлеуметтік даму қоры» қолдады.
Финалда 10 стартап жоба таныстырылды, қатысушылар медицинадағы жасанды интеллектіден бастап, ауыл шаруашылығындағы озық мониторинг жүйелеріне дейін әртүрлі салада инновациялық шешімдер ұсынды. Әр жоба үш минуттық баяндаудан (питчингтен) өтіп, содан соң стартаптың негізін қалаушылар қазылар алқасының сұрақтарына жауап берді. Сарапшыларды жобалардың ерекшелігі, нарықтық әлеуеті, әрі қарайғы жоспарлары және таныстырылған технологияларды тәжірибелік тұрғыда қолдану мәселелері қызықтырды.
Ұйымдастырушылардың айтуынша, қазылар алқасының құрамы төрағасы Премьер-министрдің орынбасары Е.Көшербаев пен ғылым, білім, бизнес салаларының жетекші өкілдерінен құралған. Қазылар шешімімен сыйақысы 12 млн теңге тұратын бірінші орынды жауынгерлік дрондарды жасауға арналған инновациялық платформа – «Game of drones» стартапы жеңді. Бұл жоба симуляциялар арқылы оқытудың неғұрлым қолжетімді, тиімді әдістерін пайдаланады. Қазіргі уақытта стартаптың 23 елден 10 мыңнан аса пайдаланушысы бар екен. Жобаның негізін қалаушы Абылайхан Жақанов: «Платформа – киберспорттың жаңа форматы, мұнда ойыншылар қозғалыс жасау арқылы шынайы техниканы басқара алады. Алайда бұл технологияның әлеуеті одан да жоғары: стартаптың шешімдерін аграрлық секторда, қорғаныс және өндіріс салаларында қолдануға болады. Осы платформа негізінде команда ұшқыштарды даярлау құнын айтарлықтай төмендетуді ұсынып отыр. Мәселен, әскери қызметкерлерді даярлау шығынын 100 есе азайтуға мүмкіндік мол», дейді.
Сыйақысы 10 млн теңге тұратын екінші орын иегері – геймификация мен AI әдістерін қолдану арқылы инсультті қалпына келтіруге көмектесетін цифрлық терапия жүйесі «Flection.AI» стартапы. Платформаның негізін қалаушы, NU профессоры Александр Пактің айтуынша, платформа Астанадағы клиникалармен бірлестікте 200 пациентке сыналып, оң нәтиже берген. Команда үй жағдайында оңалту бойынша америкалық нарыққа шығуды көздеп отыр.
3-орын мен 8 млн теңгені «Granulo system» жобасы жеңді. Бұл – тау-кен өнеркәсібіндегі өндірістік үдерістерді жақсартуға арналған кен фракциясын талдау жүйесі. Стартап конвейердегі кен мөлшерінің орналасуын бақылауға көмектеседі, бұл шар диірменінің, бұрғылау-жару жұмыстарын бақылауды жақсартады.
5 млн теңгелік көрермен көзайымы сыйлығын «Hemo lab» медтех-стартапы олжалады. Бұл – дәл диагноз қою уақытын 10 есе қысқартып, 95% дәлдікпен ауруларды ерте диагностикалауға арналған SaaS-платформасы.
Сонымен қатар барлық стартап иелері тәлімгерлік бағдарламаларына қатысу және индустриялық серіктестермен ынтымақтастық орнату мүмкіндіктеріне де ие болды. Бұл оларға өз жобаларын кеңейтіп, жаңа нарықтарға шығуға көмектеседі. Ұйымдастырушылардың ақпаратына сүйенсек, NU алдағы уақытта еліміздің басқа университеттерін де қосып, байқауды кеңейтпек. Ұзақмерзімді жоспарлардың ішінде стартаптарды қолдау қорын құру мақсаты бар, ол тұрақты негізде «Deeptech бәйге» өткізіп отыруға мүмкіндік береді.
