Жуырда ел кинотеатрларында отбасылық комедия – «Малай» фильмі жаппай көрсетілімге шықты. Бұл – «Холоп» туындысының қазақ көрерменіне бейімделген нұсқасы. Осыған дейін фильм Түркия, Моңғолия мен Францияда шыққан . Отандық нұсқада жергілікті менталитет пен әзіл ерекшеліктері ескерілді.
Басты кейіпкер – байдың мұрагері Чина (Жеңіс Омаров). Жас жігіт сән-салтанатқа әбден бой үйретіп, өзіне бәрі рұқсат деп ойлайды. Алайда оның әкесі (Жандарбек Садырбаев) ұлын сабасына түсіруді ойлап, ерекше айла-амалға барады. Елден ерекше психологпен (Дулыға Ақмолда) бірігіп, XIX ғасырдағы қазақ ауылының өмірін қайта жасайды. Чинаны сол ортаға жіберіп, «Бай баласы адам бола ма?» деген сұраққа жауап іздейді.
«Әлемдік кинода сәтті туындыларды негізге алып, олардың адаптациясын ұсыну – кең таралған әрі танымал әдіс. Біз де осы бағытты қолданып, өзімізге үлкен талап қойдық. Қазақстан қоғамында мажорлардың тақырыбы өте өзекті, сол себепті «Холоп» франшизасы бізге сәйкес келді. Бізге қазақ менталитетін, құндылықтары мен әзілін ескере отырып, бейімдеу өте маңызды болды. Сонымен қатар «Малай» – толықтай қазақ тілінде түсірілген фильм», деп атап өтті «Unico» компаниясының бас продюсері Анара Жүнісова.
Жеңіс Омаров (Zheka Fatbelly) үшін де аталған жоба үлкен сынақ болды. Себебі бұл – оның басты рөлдегі дебюті. Режиссёр мен түсірілім алаңындағы әріптестерінің айтуынша, блогер өз рөлін тамаша орындап, кадрда шынайы көрінді.
«Менің кейіпкерім неше түрлі қиындықты бастан өткерді. Физикалық жағынан өте ауыр болды, бірақ қызықты сәттер де аз емес еді. Әсіресе атпен жүру және шабу қиынға соқты. Қазір сол түсірілім күндерін сағынышпен еске аламын, демек, бәрі жақсы өтті», деді Жеңіс Омаров (Чина).
«Елімізде балалар мен ересектерге бірдей қызықты болатын фильмдер көп емес. Сондықтан «Малай» жобасында жұмыс істеу маған қызық болды. Чинаның оқиғасы мен оның өткен ғасыр ауылындағы қызықтары кішкентай көрерменді күлдірсе, үлкендер үшін мажорды тәрбиелеу тақырыбы ой салуы мүмкін», дейді фильм режиссёрі Ернар Нұрғалиев.
Айта кетейік, фильмге Дулыға Ақмолда, Лаура Мырзахмет, Жандарбек Садырбаев, Ермек Шынболатов, Аида Құрманғалиева (Мона), Сабина Мовлаева, Хамит Ердехан сынды белгілі актёрлер қатысқан.
