Израильдің Газаға жасаған соққысынан БҰҰ демеушілік ететін ұйымның бір қызметкері қаза тауып, бесеуі жараланды. Бұл туралы Палестина анклавының денсаулық сақтау министрлігі хабарлады, деп жазады Egemen.kz.
«БҰҰ-ға қарасты ұйымдарда жұмыс істеген 6 шетелдік азамат Газаның орталығындағы әуе шабуылы кезінде жарақат алды. Олардың бірі Шуһада әл-Ақса ауруханасына жеткеннен кейін көз жұмды», деп жазады Газа Денсаулық сақтау министрлігі Telegram арнасында.
Дәрігерлер жарақат алғандардың жағдайы ауыр екенін айтты.
Өз кезегінде мысырлық «Әл-Кахира әл-Ихбария» телеарнасы дереккөздерге сілтеме жасап, оқ тиген БҰҰ қызметкерлері Газа секторын миналардан тазартумен айналысқанын мәлімдеген. Оқиға анклавтың орталық бөлігіндегі Дейр-эль-Балах қаласының аймағында болды.
Айта кетейік, 18 наурызда Израиль қорғаныс күштері Газа секторындағы ХАМАС нысандарына жаппай соққы берді.
