Жаңа оқу жылына дейін білім беру ұйымдарында тамақтанудың жаңа стандартын дайындау және енгізу жоспары әзірленіп жатыр
Бұл туралы Caravan.kz медиа порталы sputnik.kz-ке сілтеме жасап хабарлайды.
Биыл білім беру ұйымдарында тамақтанудың жаңа стандарты қабылданды, ол 2025 жылдың 1 қыркүйегінен бастап қолданысқа енгізіледі.
Жаңа тамақтану стандартында балаларды қауіпсіз және сапалы тамақтанумен қамтамасыз ету бойынша халықаралық талаптар ескерілген.
«Артықшылығы — тұзды, қантты және майды тұтынуды азайту, ас мәзірінде көкөністер мен жемістерді көбірек қолдану. Құрамында қанты бар сусындар мен шырындарды газдалмаған суға, сүтке, ашытылған сүтті сусындарға, жеміс шайлары мен компоттарға алмастырады», — дейді денсаулық сақтау министрлігінің санитариялық-эпидемиологиялық бақылау комитеті.
Тамақтану стандартында ерекше диеталық қажеттіліктері бар оқушыларды тамақтандыру бойынша ұсыным қарастырылған. Сондай-ақ ас блоктары жоқ шағын жинақталған мектептерде тамақтануды ұйымдастыру көзделген.
Бұдан басқа алғаш рет жеуге жарамсыздық индексі (тамақ қалдықтары) тұжырымдамасы енгізілді.
Қазіргі уақытта жаңа оқу жылына дейін білім беру ұйымдарында стандартты дайындау және енгізу жоспары әзірленіп жатыр.
