Петропавлда теміржолдың үстімен өтетін көпірдің асфальт жабындысы жарылып, ой-шұңқырға айналған, деп хабарлайды 24KZ. Соның салдарынан көлік қозғалысы қиындап, таңертеңгілік және кешкі қарбаласта жүргізушілер ұзын сонар кептеліске тап болады. Бұл өткел қала орталығы мен Жұмысшы кентін жалғайды. Тұрғындар мәселенің біржола шешілуін күтіп жүр. Ал әкімдік тарапынан нақты қандай шаралар қолға алынбақ?
Бұл көпір көктем сайын кептелістен көз ашпайды. Жүргізушілер осылай жай жүруге мәжбүр. Жолдың жағдайы сын көтермейді. Бұл айта-айта жауыр болған мәселе. Айтпаса тағы болмайды. Өйткені баяғы жартас – сол жартас.
Виталий Оганджанян, көлік жүргізушісі:
- Бұл жолдан көліктің жүрістік бөлігі бұзылады. Одан зардап шегетін жүргізушілер. Сондықтан қалаға басқа жақпен кіруге тырысамын. Қашан өтсең – шұрық-тесік.
Бұл көпір 2014 жылы күрделі жөндеуден өткен. Ол кезде оған «Өңірлерді дамыту» бағдарламасы бойынша жергілікті бюджеттен 500 млн теңгеден аса қаражат бөлінді. Бірақ жағдай өзгермеді. Өткел жыл сайын осындай күйге түседі.
Қала мен Жұмысшы кентін жалғастыратын көпір 1960 жылдары салынған. Жергілікті билік өкілдері оны тағы да жөндеу керек деп отыр. Өткелдің пайдалану мерзімі өтіп кеткен.
Әсем Айтулова, қала әкімінің баспасөз хатшысы:
- Универсальная көшесінде жаңа көпір салынып жатыр. Сол көпір биылғы жылы қолданысқа беріледі. Сол көпір берілгеннен кейін жаңағы Караванная көшесіндегі көпірді жөндеуге жабу мүмкіндігі болады. Әзірше, «текущий ремонт» дейміз, жасалады.
Бұл көпір жүргізушілердің ғана емес, жаяу жүргіншілердің де жүйкесін жұқартқан. Өйткені оларға арналған жолақ тым тар. Сондықтан адамдар сығылысып жүруге мәжбүр.
Авторлары: Айдарбек Айтмұхамбетұлы, Қуаныш Қазбеков
