Мемлекет басшысының тапсырмасы аясында еліміздің шағын қалалары , аудан орталықтары мен ауылдарындағы мектептерді жаңғырту жұмыстары жүйелі түрде жалғасып жатыр. 2025–2026 жаңа оқу жылында тағы кемінде 1000 мектеп жаңғыртудан өтеді деп жоспарланған, деп хабарлайды Egemen.kz.
Бұл бастама ауыл мен қала арасындағы білім сапасындағы алшақтықты азайтуға және балалардың сапалы білім алуына қолайлы жағдай жасауға бағытталған. Жаңғырту жұмыстары жеті негізгі бағыт бойынша жүзеге асырылады.
Жаңғырту аясында күрделі және ағымдағы жөндеу жұмыстары, пәндік кабинеттермен жабдықтау, мектеп жиһаздарын жаңарту, кітапханалар мен асханаларды, қауіпсіздік жағдайларын жақсарту қарастырылған.
Осылайша, 2025–2026 оқу жылында робототехника, химия, биология, физика және STEM бағыттары бойынша 1000-ға жуық заманауи пәндік кабинет сатып алу жоспарлануда. 509 мектептің кітапханасын, 375 мектептің асханасын жаңғырту, 598 мектепке күрделі және ағымдағы жөндеу жүргізу, 409 мектептің жиһаздарын жаңарту жоспарланған.
Аталған жобаның нәтижесінде 369 мың оқушының оқу және тәрбиелену жағдайын жақсарту көзделіп отыр.
