Құжат "Ашық НҚА" порталында жарияланды.
Мәдениет және ақпарат министрінің "Астана Опера" мемлекеттік опера және балет театрының Қамқоршылық кеңесінің құрамын өзгертуге қатысты бұйрық жобасы шықты, деп хабарлайды inbusiness.kz сайты.
– "Астана Опера" мемлекеттік опера және балет театры" коммерциялық емес акционерлік қоғамының Қамқоршылық кеңесінің құрамы Қазақстан Республикасы Үкіметінің 2013 жылғы 22 мамырдағы № 512 қаулысымен бекітілген және Қазақстан Республикасы Үкіметінің 2021 жылғы 1 маусымдағы № 362 қаулысымен өзгертілді. Қазір Қамқоршылық кеңестің жекелеген мүшелері қаулыда көрсетілген лауазымды атқармайды. Кадрлық өзгерістерге байланысты Қамқоршылық кеңес мүшелерінің құрамына өзгеріс енгізу қажеттілігі туындады, – делінген түсіндірме жазбада.
Осылайша театрдың Қамқоршылық кеңесі мүшелерінің құрамын өзектендіру мақсаты қойылып отыр.
– Енгізілетін өзгеріс қамқоршылық кеңес құрамын өзекті кадрлық құрылымға сәйкес келтіру қажеттілігімен негізделген, – деп түсіндірілген құжат жобасында.
"Астана Опера" мемлекеттік опера және балет театрының Қамқоршылық кеңесінің құрамынан кімдер шығарылды?
– Назарбаева Дариға Нұрсұлтанқызы – бұрынғы Қазақстан Республикасы Парламенті Мәжілісінің депутаты;
– Құлыбаев Тимур Асқарұлы – бұрынғы "Атамекен" Қазақстан Республикасы Ұлттық кәсіпкерлер палатасының төралқа төрағасы;
– Сатқалиев Алмасадам Майданұлы – Энергетика министрі;
– Машкевич Александр Антонович – ERG Sarl менеджерлер кеңесінің төрағасы:
– Шодиев Патох Каюмович – ERG Sarl менеджерлер кеңесінің төрағасы;
– Рақышев Кеңес Хамитұлы – "Fincraft Resources" акционерлік қоғамы директорлар кеңесінің төрағасы;
– Смағұлов Нұрлан Еркебұланұлы – "Astana Group" холдингінің президенті;
– Васкес Лучано – ENI S.p.A. Орталық Азия филиалының басшысы.
"Астана Опера" мемлекеттік опера және балет театры"
коммерциялық емес акционерлік қоғамы жанындағы қамқоршылық кеңестің құрамы
Жаңа құрамда кімдер болады?
– Қазақстан Республикасының Мәдениет және ақпарат министрі;
– Астана қаласының әкімі;
– "Астана Опера" мемлекеттік опера және балет театры" коммерциялық емес акционерлік қоғамының директоры (келісу бойынша);
– Аблазимов Бахаридин Нугманович, "ҚазАзот" акционерлік қоғамы директорлар кеңесінің төрағасы (келісу бойынша);
– Баталов Райымбек Әнуарұлы, "Атамекен" Қазақстан Республикасы Ұлттық кәсіпкерлер палатасы басқарма төрағасының міндетін атқарушы (келісу бойынша);
– Жақыпов Нұрлан Қаршығаұлы, "Самұрық-Қазына" акционерлік қоғамының басқарма төрағасы (келісу бойынша);
– Ибрагимов Шухрат Алиджанұлы, ERG S.a.r.l. директорлар кеңесінің төрағасы, бас атқарушы директор (келісу бойынша);
– Хойтинк Сегер, Agip Karachaganak B.V. төрағасы және басқарушы директоры (келісу бойынша).
