Әлеуметтік желіде жол ережесін өрескел бұзған мопед жүргізушілерінің бейнежазбалары тарады.
Кадрларда бір топ мопед мінген адамның бағдаршамның қызыл түсіне тоқтамай өтіп кеткені және көлік қозғалысына тыйым салынған Арбат аумағында жүріп-тұрғаны байқалады, деп жазады inbusiness.kz сайты.
Алматы қалалық Полиция департаменті аталған ереже бұзушылардың анықталып, ұсталғанын мәлімдеді.
"Жүргізушілерге қатысты ҚР ӘҚбК-нің 615 және 620-баптары бойынша әкімшілік хаттамалар толтырылды. Мопедтер айыппұл тұрағына қойылды," – деп хабарлады полиция өкілдері.
Сонымен қатар, құқық қорғау органдары мопед жүргізушілеріне 5 сәуірге дейін көлік құралдарын міндетті түрде тіркеуден өткізу қажеттігін ескертті.
