Кең байтақ қазақ даласына қоныс аударған түрлі этностың миллиондаған өкілі қонақжай қазақ халқына ризашылығын білдіруді дәстүрге айналдырды. Осы орайда Қонаев қалалық көпсалалы ауруханасының сәулелі зерттеу бөлімшесінің лаборанты Николай Недоводеевпен аз-кем тілдескен едік. Мемлекеттік тілді еркін меңгерген жас маман Отаны мен ортасына зор алғысын жеткізді.
– Николай Сергеевич, сөз басын туған жер, өскен ортаңыздан бастасаңыз. Медицинаға жүрек қалауыңызбен келдіңіз бе?
– Ауыл – қазақтың алтын тамыры, ұлтымыздың ұйтқысы ғой. Сондықтан өзім туып-өскен мекенім Оңтүстік Қазақстан облысы Шақпақ баба ауылын мақтан етемін. Киелі мекенде 14 жасыма дейін ата-анаммен тұрдым. Достарым Аян және Рашид үшеуміз ауылдың шаңына аунап-қунап, ауыр жұмысқа әбден ысылып, мал бағып, шөп шауып, көкпар тартып өстік. Ауылымызда барлығы қазақ тілінде сөйлейтін еді. Сондықтан отбасымызбен Қонаев қаласына қоныс аударғанымызда орыс тілін меңгеріп, еркін сөйлеу қиынға соқты. Себебі орыс болсам да, жүрегім «қазақ» деп соққан азаматпын. Мектептен соң медициналық колледжге түсіп, оқуымды ойдағыдай аяқтағаныма да бес жыл толып қалыпты. Мамандығымды адаспай таңдағаныма күнде қуанамын. Медицина саласында еңбек ететінімді кішкентай кезімнен-ақ білетінмін. Өйткені дәрігер, медбикелерді көргенімде жүрегім ерекше сезімде болатын.
– Еңбек ететін бөлімшеңіздің жұмыс жайын тарқата кетсеңіз.
– Бөлімшенің құрамына рентгенодиагностикалық кабинет, флюорографиялық кабинет, рентгендік компьютерлік томография кабинеті, магнитті-резонансты томография кабинеті кіреді. Бөлімшеде жұмыс істейтін дәрігерлер жақын және алыс шет елдердегі ірі республикалық орталықтарда оқыған. Бөлім жетекші әлемдік өндірушілердің диагностикалық жабдықтарының толық жиынтығымен жабдықталған. Жалпы, кез келген емдеу үдерісінің сапасы ең алдымен сенімді және толық диагнозға байланысты ғой. Сондықтан мен жұмыс істейтін бөлімшеде диагнозға ерекше жауапкершілікпен қарайды. Сәулелік диагностиканың жоғары білікті дәрігерлері мен заманауи рентгенодиагностикалық аппаратураның барлық спектрі – дұрыс диагноз қоюдағы табыстың кепілі. Сәулелік диагностика – бұл медицинадағы дербес бөлім, ол сәулеленудің әртүрлі түрлерін қолдану негізінде диагностикалық мақсаттарға кескін алудың әртүрлі әдістерін біріктіреді.
– Қазіргі ортаңызда қандай этнос өкілдерімен араласып тұрасыз?
– Ұжымымыз өте үлкен. Мұнда татар, өзбек, ұйғыр, кәріс, украин, басқа да этнос өкілдерімен бір отбасының балаларындай еңбек етеміз. Бір-бірімізге бағыт беріп, қамқор болу, сүрінгенге сүйеніш, жылағанға жұбаныш болуды басты парызымыз санаймыз. Мұндай асыл қасиет пен кең пейіл дарқан даламыздан, қазақы қасиеттен бойымызға дарыды.
Кейінгі уақытта қазақша сөйлейтін этнос өкілдерінің айтарлықтай көбейгенін басты жетістігіміз деп білемін. Қазақша өзім ғана емес, үйдегі ата-анам, бауырым, жұбайым Настя, қызым Эмилия да сөйлейді. Мемлекеттік тіл – ана тіліміз тәрізді, әрқашан құрметтейміз. Қабылдауыма келген пациенттердің қалауына қарай екі тілде еркін тілдесемін.
Наурыз – ырыс-ынтымағымыз артып, ортақ тағдыр тоғыстырған халқымыз бір-біріне шынайы алғыс сезімі мен ризашылығын білдіретін айтулы ай екені сөзсіз. Ұлт пен ұлыс арасындағы өзара құрмет пен сыйластық бізді жаңа биіктер мен белестерге бастай беретініне сенімім мол. Мүмкіндікті пайдалана отырып, туған еліме, жерлестеріме, өзім еңбек етіп жүрген аурухананың директоры Айман Ғалымжанқызына, әріптестеріме, ата-анама, жақындарыма ерекше алғысымды білдіремін!
Алматы облысы,
Қонаев қаласы
