Қостанай облысында жолдардағы су тасқынынан алдын алу үшін су толтырылатын бөгеттер қолданылуда, деп хабарлайды Zakon.kz.
"ҚазАвтоЖол" ҰК" АҚ баспасөз қызметінің хабарлауынша, Қостанай облыстық филиалының жолшылары "Қостанай – Әулиекөл – Сұрған" тас жолының (211 км) және "Солтүстік Қазақстан облысының шекарасы – Сарыкөл – Қостанай" тас жолының (689–690 км) учаскелерінде су тасқынының алдын алу бойынша маңызды іс-шаралар жүргізді.
Олар жолдарды су басудан қорғау мақсатында арнайы су толтырылатын бөгеттер орнатты.
Су толтырылатын бөгет – ұзындығы 25 метр, биіктігі 1,5 метр болатын су өткізбейтін берік материалдан жасалған арнайы қорғаныс құрылымы. Құрылым ішіндегі арнайы саңылаулар арқылы су немесе ауа толтырылғаннан кейін, ол ауыр әрі тұрақты қалыпқа келеді. Мұндай бөгеттер судың таралуына жол бермей, кедергі жасайды.
Су тасқыны қаупі жойылғаннан кейін бөгет ішіндегі су немесе ауа шығарылып, құрылым жинақы күйде бүктеліп, келесі қолдануға дейін сақтауға қойылады.
Су толтырылатын бөгеттердің негізгі артықшылығы – олардың мобильділігі мен орнатылу жылдамдығы. Оларды тасымалдау оңай және су басу қаупі бар аумақтарға тез арада орнатуға болады.
Бұған дейін "ҚазАвтоЖол" үш өңірдегі жол учаскелерінде шектеу енгізілгенін хабарлаған.
