Махмұд Сабырхан әлем чемпионатының ширек финалына шықты.
55 келіде Махмұд Сабырхан Косово боксшысы Башким Бажокуды бірінші раундтың 30-секундында нокаутқа жіберді. Соққының жойқын болғаны соншалық, Бажоку өздігінен аяққа тұра алмай, оған дәрігерлердің көмегі қажет болды. Осылайша қазақстандық былғары қолғап шебері әлем чемпионатының 1/4 финалына шықты. Ендігі қарсылас Нидерланд-Жапония кездесуінде анықталады.
1/16 финалда Сабырхан Брайан Ортисті жеңген болатын.
Айта кетейік, Махмұд Сабырхан – 2023 жылғы әлем чемпионы, 2021 жылғы әлем чемпионатының күміс жүлдегері, 2022 жылғы Азия вице-чемпионы.
Биылғы әлем чемпионаты World Boxing жаңа ұйымының демеушілігімен алғаш рет өткізіліп отыр. 4 қыркүйекте басталған турнир 14-іне дейін жалғасады. Қазақстан атынан өнер көрсетіп жатқан 20 боксшының 17-сі әзірге жарыс жолын жалғастыруда. Ал, үш боксшымыз қарсыластарына жол берді.
