Қазақстан АҚШ визасын алғысы келетін Ресей азаматтары үшін "визалық хабқа" айналды . Астана Ресей азаматтары өтініш бере алатын екі қаланың бірі болды, — деп хабарлайды Massaget.kz тілшісі.
6 қыркүйектен бастап АҚШ-тың көші-қонға жатпайтын визаларына, соның ішінде В1/В2 санатындағы туристік визаларға өтініш беру ережелері күшіне енді. Енді құжаттарды тек азаматтық арқылы немесе тұрақты тұратын елде ғана тапсыруға болады.
Баспасөз атташесі Кристофер Соренсеннің айтуынша, жаңа ережелер қазақстандықтарға әсер етпейді.
"Бұл өзгеріс Қазақстанда АҚШ визасына өтініш беретін Қазақстан азаматтарына қатысты емес. Қазақстан азаматтары бұрынғыдай АҚШ-тың Астанадағы елшілігіне немесе Алматыдағы бас консулдығына өтініш бере алады", — деді ол.
Дипломаттың айтуынша, өзгерістер ең алдымен виза рәсімдеудің тұрақты тәртібі жоқ елдердің азаматтарына, соның ішінде Ресейге қатысты.
"Ресей азаматтары үшін енді жаңа тәртіп енгізілді: сұхбаттасу АҚШ-тың Астанадағы (Қазақстан) елшілігінде және Варшавадағы (Польша) консулдығында өтуге тиіс", — деп толықтырды баспасөз атташесі.
Аптаның басты оқиғалары мен пайдалы видеоларды көру үшін YouTube арнамызға жазылыңыз
