Эстрада және опера әншісі, Қазақстанның еңбек сіңірген қайраткері Толқын Забирова жуырда дүниеден өткен анасы жайлы естеліктерін “Бүгін LIVE” бағдарламасында бөлісті, деп хабарлайды KAZ.NUR.KZ.
“Өмірге деген құштарлық — анамның ақ сүтімен бойыма сіңген қасиет. Анам өте өнерлі жан еді. Алғаш сахнаға шыққанымда сахна киімдерімді тігіп берген. Өнерге, білімге баулыды. Әкемнің орны жоқтығын білдірмей, 1979 жылы Аягөзден Алматыға алып келіп, білім алуыма сеп болды. А. Жұбанов атындағы Республикалық музыка мектебіне орналастырып, музыка жағынан сауатымды ашып, консерватория, одан кейін аспирантурада білім алуыма себеп болды. Бүгінде кандидаттық диссертациямды қорғап, профессор атандым, шәкірт тәрбиелеп отырмын – бәрі де анамның арқасында”, – деп еске алды ол.
Әнші жуырда Астана және Алматыда шығармашылық кешін береді. “Өмірге ғашықпын” концерті 17 қазанда Алматыда және 23 қазанда Астанада өтеді. Өнер иесі шығармашылық кешін анасына арнайтынын атап өтті.
Айта кетейік, Толқын Забирова – қазақ эстрадасына опералық музыканы әкелген тұңғыш әншінің бірі. Қазақстанның еңбек сіңірген қайраткері. Өнертану ғылымдарының кандидаты. Қазақ ұлттық өнер академиясының профессоры.
Мәтіннен қате тапсаңыз, бізге жазыңыз
