АҚШ Камбоджа және Малайзиямен сауда келісімдері аяқталды.
Сондай-ақ Таиланд пен Вьетнаммен келіссөздерде ілгерілеу бар. Жалпы көлемі 475 миллиард долларды құрайтын АҚШ пен Оңтүстік-Шығыс Азия елдері қауымдастығы арасындағы сауданың шамамен 68 пайызын қамтитын бұл келісімдер Қытайға қарсы бағытталған ережелерді қамтиды, деп хабарлайды inbusiness.kz сайты.
Президент Дональд Трамп бұл туралы Малайзияда өткен аймақтық көшбасшылар саммитінде мәлімдеді. Ол сапарының мақсаты – Индо-Тынық мұхиты аймағындағы экономикалық және қорғаныс байланыстарын нығайту екенін атап өтті.
Келісімдер энергетика, технология, жасанды интеллект және маңызды пайдалы қазбалар салаларындағы ынтымақтастықты көздейді. АҚШ кейбір елдерге 19-20 пайыздық тарифтерді сақтап, өз нарықтарын ашуға ынталандыруды жалғастырады.
АҚШ-тың сауда өкілі Джеймисон Грирдің айтуынша, жаңа келісімдер сауда тапшылығын азайтып, америкалық өндірушілер мен фермерлерге экспорттық мүмкіндіктерді кеңейтеді.
Вьетнам және Таиландпен жасалған рамалық келісімдер жеткізу тізбегінің тұрақтылығын арттыруды, экспорттық бақылау мен инвестициялық қауіпсіздік салаларында әріптестікті күшейтуді көздейді.
