Жасы жүзге таяған Фёдор Ковалев Ұзынағаштағы көзі тірі жалғыз соғыс ардагері.
Ол 17 жасында майданға аттанған. Алты айлық оқу -жаттығудан өткен бозбала Беларусь, Пруссия, Калининград майданында ерлік көрсетті. Жапон соғысын да көрді. Ардагер әлемде енді соғыс болмаса екен деп тілейді.
Фёдор Ковалев 1927 жылы Белорусь елінде дүниеге келген. 1944 жылы әскер қатарына шақырылып, 1945 жылдың тамыз айында кеңес-жапон соғысына қатысады. Жапонияның жеңілісі КСРО-ның Қиыр Шығыстағы қауіпсіздігін қамтамасыз етіп, екінші дүниежүзілік соғыстың аяқталуын тездетті.
Фёдор Ковалев, соғыс ардагері:
- Моңғолия, Маньчжурия аумағын басып өтіп, жапондармен шайқастық. Адам шығыны өте көп болды. Әскери қақтығыстар негізінен түн ішінде басталатын. "Ерлігі үшін" медалімен марапатталдым. 1951 жылға дейін Дальний қаласында әскери борышымды өтедім. Взвод командирінің орынбасары, взвод командирі болдым.
Фёдор Ковалев соғыс аяқталған соң өзінің туған ауылында комбайншы болып еңбек етті. 1969 жылы Алматы облысының Жамбыл ауданына қоныс аударады. Ұзынағаштағы ауыл шаруашылығы техникаларын жөндеу орталығында 20 жылдай слесарь, электрдәнекерлеуші болып жұмыс істеп, зейнетке шықты. Соғыс және еңбек ардагері Жамбыл ауданының құрметті азаматы атанып, бірнеше мерейтойлық медальмен марапатталды.
Мейірбек Ерекеев, Жамбыл ауданы әкімінің баспасөз хатшысы:
- Мемлекет тарапынан қаржылай сыйақы беріледі және дәрігерлер келіп, ұдайы тексеріс жұмыстарын жүргізіп, денсаулығын қадағалап, бақылауда ұстайды. Сосын жастар ресурстық орталығы, ауданның волонтёрлары арнайы келіп, тазалық жұмыстарына, азық-түлікпен көмек көрсетіп, осындай игі шараларды ұйымдастырып тұрады.
Фёдор Мельянович зайыбы екеуі үш ұл тәрбиелеп өсірді. Бүгінде 10 немересі, 10 шөбересі бар. Соғыс ардагері жас ұрпақтың болашағы жарқын болуы үшін жер бетінде бұдан былай соғыс өрті тұтанбағанын қалайды.
Фёдор Ковалев, соғыс ардагері:
- Ең бастысы — жер бетінде соғыс болмасын, балаларым. Жеңістің 80 жылдығына ардагерлеріміздің көбі жете алмады. Бірнеше жыл бұрын Жамбыл ауданында 20 ардагер бар еді. Қазір жалғыз қалдым. Жасым 98-де. Еліміздің барша тұрғындарына бақыт тілеймін!
Бүгінгі таңда Алматы облысында 5 соғыс ардагері тұрады, Олар Солтанбай Жарықбасов, Тәңірберген Толғанбаев, Алим Кебиров, Оксана Бетебаева және біздің бүгінгі кейіпкеріміз Фёдор Ковалев. Жеңістің 80 жылдығына орай әрбір соғыс ардагеріне мемлекет тарапынан 5 млн теңгеден сыйақы беріледі.
Ардақ Айбарұлы, Аят Дүйсенбаев, Аманжол Жөңкешов