Премьер-министрдің орынбасары – Сыртқы істер министрі Мұрат Нұртілеу Астанаға ресми сапармен келген Әзербайжан Республикасының Сыртқы істер министрі Джейхун Байрамовпен келіссөз жүргізді .
Әзербайжан министрінің сапары Қазақстан мен Әзербайжан арасындағы Стратегиялық серіктестік және одақтастық қатынастар туралы шарттың 20 жылдығы аясында өтті. Кездесу барысында екі бауырлас ел арасындағы саясат, сауда, экономика, энергетика, көлік, транзит, сондай-ақ мәдени-гуманитарлық байланыстарды қоса алғанда екіжақты өзара іс-қимыл мәселелерінің кең ауқымы талқыланды.
Сыртқы істер министрі екіжақты қарым-қатынастардың серпінді дамуын, мемлекет басшыларының стратегиялық мақсаттарға қол жеткізудегі саяси ерік-жігерінің рөлін атап өтті.
– Қазақстан мен Әзербайжан өзара түсіністік пен сенімнің жоғары деңгейін көрсетеді. Бұл біздің барлық саладағы ынтымақтастығымызды дәйекті түрде дамытуға мүмкіндік береді. Біз өзара іс-қимылды, әсіресе сауда-экономикалық және инвестициялық салаларда одан әрі кеңейтуге бағытталғанбыз, – деді М.Нұртілеу.
Тараптар кейінгі бес жылда қабылданған шаралар арқылы бес есеге ұлғайып, 2024 жылы 533,4 млн долларға жеткен тауар айналымының айтарлықтай өскенін қанағаттанушылықпен атап өтті. Экономикалық ынтымақтастықты одан әрі тереңдету мақсатында бұл көрсеткішті 1 млрд долларға дейін жеткізу ниетін растады.
Келіссөздердің маңызды тақырыбы энергетика саласындағы ынтымақтастықты нығайту болды. Министрлер Әзербайжан аумағы арқылы қазақстандық энергоресурстардың транзиті саласындағы табысты өзара іс-қимылды құптады. Баку – Тбилиси-Джейхан құбыры арқылы мұнайды тасымалдау көлемі өткен жылдың қорытындысы бойынша 1,4 млн тоннаны құраған. Ал ортамерзімді келешекте жылына 2,2 млн тонна деңгейіне жету күтіліп отыр.
– Біз Қазақстанды Орталық Азиядағы басты серіктес ретінде қарастырамыз. Бүгінгі келіссөздер көлік, инвестициялар, энергетика және білім беруді қоса алғанда түрлі бағыттардағы ынтымақтастықты одан әрі нығайтуға деген өзара ұмтылысты растады, – деп мәлімдеді Д.Байрамов.
Тараптар ауыл шаруашылығы, өнеркәсіптік кооперация, ғарыш және телекоммуникация саласындағы өзара іс-қимылды жандандыруға келісті. Ынтымақтастықты нығайтуға былтыр құрылған Қазақстан – Әзербайжан тікелей инвестициялардың инвестициялық қоры ықпал етеді.
Келіссөз барысында мәдени-гуманитарлық ынтымақтастыққа баса назар аударылды. Кейінгі екі жылда елдерде Қазақстан мен Әзербайжанның мәдениет күндері өтті. Биыл наурызда Бакуде Қазақстанның 23 университетінің қатысуымен қазақстандық жоғары білім беру күндері өтіп, оның қорытындысы бойынша ынтымақтастық туралы 40 меморандумға қол қойылды.
Министрлер сондай-ақ өңірлік және жаһандық күн тәртібінің өзекті мәселелерін талқылады, БҰҰ, ТМҰ, АӨСШК, ТМД, ИЫҰ және Каспий саммиті шеңберінде одан әрі ынтымақтастыққа дайындығын растады. Келіссөз қорытындысы бойынша 2025–2026 жылдарға арналған сімаралық өзара іс-қимыл жоспарына қол қойылды.
– Бүгінгі басқосу мемлекеттеріміздің көпжылғы жемісті ықпалдастығын жаңа әрі сапалы деңгейге көтерудің және қол жеткізілген уағдаластықты жүзеге асыру жолдарын саралап алудың орайлы сәті деп санаймыз. Қазақстан мен Әзербайжан – қарт Каспийдің қос жағалауына ежелден қоныс тепкен бауырлас елдер. Бізді түбі бір түркітілдес халықтар ретінде ортақ тарих, өзара жақын мәдениет және тамырлас рухани құндылықтар байланыстырады, – деді еліміздің Сыртқы істер министрі Мұрат Нұртілеу келіссөзден кейінгі БАҚ өкілдері алдында жасаған мәлімдемеде.
Министрдің айтуынша, қазақ-әзербайжан қарым-қатынасы конструктивті саяси диалогтің арқасында қарқынды дамып келеді.
