Еңбек және халықты әлеуметтік қорғау министрлігі қолданыстағы кейбір бұйрықтарға түзетулер енгізді.
Соған сәйкес енді елімізде тұрғылықты жері жоқ адамдарға, түрмеден босатылған және пробация қызметінде есепте тұрғандарға, сондай-ақ тұрмыстық зорлық-зомбылықтың құрбандарына арналған уақытша болу ұйымдары құрылады, деп хабарлайды inbusiness.kz сайты.
Құжатқа сәйкес, мұндай ұйымдарда стационарлы, жартылай стационарлы үлгідегі қызмет пен үй жағдайында қызметтер көрсетіледі. Үйде қызмет көрсету ұйымдары бір-бірінен 5 шақырымнан астам қашықтықта құрылады.
"Уақытша болу ұйымдары тұрғылықты жері жоқ адамдарға, бас бостандығынан айыру орындарынан босатылған және (немесе) пробация қызметінде есепте тұрған адамдарға, сондай-ақ адам саудасының және тұрмыстық зорлық-зомбылықтың құрбандарына арналған. Олар мемлекеттік секторда республикалық маңызы бар қалаларда, астанада, облыстық маңызы бар қалаларда, аудандық маңызы бар қалаларда халық саны 100 мың адамнан жоғары болған кезде құрылады", — делінген министрліктің бұйрығында.
Мұндай орталықтар халық саны 50 мың және одан асатын елді мекендерде, аудандарда және ауыл округтерінде жергілікті атқарушы органдардың шешімі бойынша бір аудан деңгейінде құрылмақ.
